دایكە عالیە داروەند، دایكی ئامەد شاهۆ كۆچی دوایی كرد

24 ئایار, 2023

دوێنێ لەهەواڵێكی دڵتەزێندا، هەواڵی كۆچی دوایی دایكە عالیە داروەند، دایكی هەڤاڵمان ئامەد شاهۆ ئەندام ئەنجوومەنی پارتەكەمان پێگەیشت.

دایكە عالیە داروەند لە تەمەنی ٧٦ ساڵەگیدا بەهۆی بەساڵاچوونی تەمەن و نەخۆشی كوت و پڕەوە دوێنێ لەنەخۆشخانەی مەریوان كۆچی دوایی كرد.

هەر بۆیەش لەسەر ناوی ئەنجوومەنی پارتی ژیانی ئازادی كوردستان كۆچی دوایی دایكی هەڤاڵی شۆڕشگێڕمان “ئامەد شاهو” ئەندامی مەجلیسی پارتەكەمان پرسە و سەرەخۆشی خۆمان لەهەڤاڵ ئامەد و كەس و كار و بنەماڵە سەربەرزەكەیان رادەگەینین و دەڵێین رۆحی دایكە عالیە لەئاسمانی وڵاتی رۆژدا شاد بێت.

دایكە عالیە خەڵكی گوندی”ولەی ژێر”ی سەر بەشاری مەریوانە. سەرجەم تەمەنی لەناو زۆر و زەحمەتیدا ژیاوەو دایكێكی رەنجدەر، دڵسۆز، وڵاتپارێز و نیشتمان پەروەر بوو کە هەمیشە پێداگری لەسەر پاراستنی خاک و نیشتمان کردووەو لەو پێناوەدا رۆڵەی تێکۆشەر و قارەمانی پێشکەشی گەل و نیشتمان کردووە. بۆیە كۆچی دوایی ئەم دایكانەش لەم کات و ساتەدا کە نەیارانی کورد بە هەر شێوەیەک پەلاماری سەر خاک و نیشتمانی کوردستان دەدەن بۆ گەلەكەمان و پاراستنی وڵات و خاوەندارندەركەوتن لەنرخ و بەها نەتەوەیی و كۆمەڵایەتیەكان خەسارێكی مەزن و بەئێشە، بۆیەش بەئەركی هەر تاكێكی كورد و وڵاتپارێز دەزانین بەبەشداربوونیان لەمەراسیمی پرسە و سەرەخۆشیدا خاوەنداری لەنرخ و بەهای وڵاتەکەمان بكەن.

لەكۆتاییدا جارێكی تر پرسە و سەرەخۆشی خۆمان لەكەس و كار و بنەماڵەی وڵاتپارێزی دایكە عالیە داروەند و هەڤاڵ ئامەد و گەلی قارەمان و تێکۆشەری شاری مەریوان و گەلەکەمان لەرۆژهەڵاتی کوردستان دووپات دەكەینەوە.

ئەنجوومەنی پارتی ژیانی ئازادی كوردستان – پژاک

24-5-2023